- O peche total da brecha de xénero achegaría 255.755 millóns de euros á economía española
A igualdade entre homes e mulleres no terreo económico está un pouco máis preto este ano que o pasado pero aínda moi moi lonxe de alcanzarse. O índice de paridade de xénero que desenvolve a asociación Closing Gap, que vai pola súa quinta edición, sinala que esta diferenza reduciuse moi lixeiramente, en apenas 0,8 puntos porcentuais, grazas a melloras no terreo laboral e da conciliación pero, tendo en conta esta evolución, aínda se tardarían 37 anos en pechar totalmente a brecha de xénero en España.
O informe analiza cinco categorías, Emprego, Educación Conciliación Saúde e Benestar e Dixitalización, onde estuda 28 variables. En todas estas categorías hai brechas de xénero importantes sendo as máis graves en Conciliación e Emprego, onde as diferenzas son maiores. Se a paridade total, segundo este índice, sería alcanzar o 100 na medición das súas variables, en Conciliación, España só alcanza os 44,4 puntos e en Emprego, os 68,1. En conxunto das cinco categorías, España quedaría nos 65,7 puntos, o que implica que queda unha brecha de 34,3 puntos por pechar.
A pandemia esborrallou os datos de paridade en termos de conciliación
E isto xa supón unha melloría, porque en 2023, os puntos alcanzados en Emprego quedaron en 67,3 e en Conciliación, en 43,1. Esta última categoría, a máis preocupante porque non alcanza nin os 50 puntos, rexistrou por fin unha puntuación igual a antes da pandemia. O Covid-19 e os confinamentos supuxeron que as mulleres asumisen o groso dos coidados, o que implicou un esborralle do índice de conciliación ata os 40 puntos. “As mulleres víronse afectadas negativamente pola pandemia en termos de conciliación ao incrementarse as taxas de parcialidade”, explicou Lucila García, directora xeral da Asociación ClosinGap.
Evolución do Índice ClosinGap
“Todas as brechas de xénero incorporadas ao índice afectan de maneira directa ou indirecta ao PIB a través do mercado laboral”, explicou Anna Merino, directora de Strategy e Economics de PwC e coordinadora do informe, na súa presentación hoxe en Madrid. Neste sentido, e segundo os cálculos da asociación, a menor taxa de emprego e actividade das mulleres no mercado laboral, o menor número de horas traballadas debido á maior parcialidade e a presenza de máis mulleres en sectores con menor produtividade impactan de forma directa no PIB en ata 255.755 millóns de euros. É dicir, o custo de oportunidade de pechar a brecha de xénero para a economía española é deses 255.755 millóns, o que supoñería un aumento no PIB do 17,1%. En termos de emprego, este custo de oportunidade ascendería a 2,9 millóns d empregos femininos equivalentes a tempo completo.
O único indicador que descende é o de Saúde e Benestar, que aínda que está máis próximo á paridade que ningún outro, con 83,7 puntos, está a empeorar ano a ano. A caída débese principalmente a dúas variables, os anos de boa saúde respecto a a esperanza de vida, onde as mulleres vivimos máis pero con peor calidade e o risco de pobreza e exclusión.
Closing Gap é unha asociación española sen ánimo de lucro que ten como obxectivo impulsar o crecemento económico desde a igualdade de xénero. Formado por 14 grandes empresas: Merck, Mapfre, Repsol, BMW, Mahou San Miguel, PwC, CaixaBank, Grupo Social ONCE, Kreab, Fundación CEOE, Telefónica, Redeia, Herbert Smith Freehills Spain e Enagás, ten o obxectivo de acelerar a transformación en favor da igualdade de oportunidades entre mulleres e homes.
